من طرف ياسلام لو اي زول
يوم تضيق الدنيا بيهو
يقدر يلقى وسط همومو
زول حنين يسأل عليهو
زول تفتش ليو روحك
لما تحتار تمشي ليهو
ولما تمرق من دواخلك
او تضيع منك مداخلك
تبقى مارق شان تجيهو
زول بيشيلك في ودارك
يبني بالحنيه دارك
ويوم تلهلب فيك نارك
يطفي جمرك بي ايديهو
ولو حصل ضاق بيك مكانك
او زمانك مرة خانك
برضو بفتح ليك حته
بين رموشو وبين عينيهو
وتسوى ايه الدنيا من غير
زول يحسك .....
يبقى عايش في كيانك
شان يحرك ليك حسك
وتبقى مليان انت بيهو
وايه تكون السكه من غير
زول رفيقك ...
يمشي بيناتك ويسرع
شان يسهل ليك طريقك
ولو كمان السكه صعبت
تلقى في دربك مشيهو
وياسلام لو اي زول
يوم تضيق الدنيا بيهو
يقدر يلقى وسط همومو
زول حنين يسأل عليهو
